سولدوز

گونتای گنجالپ


«سولدوز» بؤيوک چينگيز خان`ين ايقتيدارا يوکسه لمه يولونو آچان بير تورک- موغول قؤومودور.
(رشيدالدين فضل اللاه همداني «جامع التواریخ»)


سن منيم يوردومون قهره مان شهه ري
آدين ديره نيشله ائشيتدير سولدوز .
قورتولوش شرقيسين يوکسه ک بير سسله
بوتون تورک يوردونا ائشيتدير سولدوز.

تورک اوغلو شهيدله ر قوينوندا ياتار
دوًشله ري اورمو`دان تبريز`ه چاتار
توپلاييب بير يئره نه قده ر تورک وار
اؤزگورلوک اوغرونا ائييتدير سولدوز.

غئيره تين اؤنونده سجده يه گله ن
يولوندا جان وئريب روحه ن يوکسه له ن
قانييلا ظولمه تين باغريني دله ن
قوينوندا اويويان شهيددير سولدوز .

سنده ن اوزاقلاردا ياشاسام دا من
بوتون خه ياليما يئرله شميسه ن سن
عشقين اکسيک اولسا بير آن قلبيمده ن
وارليغيم جانسيز بير مئييتدير سولدوز.
27.05.2009


Güntay Gəncalp
Sulduz

”Sulduz” Böyük Çingiz Xanın iqtidara yüksəlmə yolunu açan bir türk-moğul qövmüdür.
(Rəşidəddin Fəzlullah Həmədani ”came-ul təvarix”)

Sən mənim yurdumun qəhrəman şəhri
Adın dirənişlə eşitdir Sulduz.
Qurtuluş şərqisin yüksək bir səslə
Bütün türk yurduna eşitdir Sulduz.

Türk oğlu şəhidlər qoynunda yatar
Düşləri Urmudan Təbrizə çatar
Toplayıb bir yerə nə qədər türk var
Özgürlük uğruna eyitdir Sulduz.

Qeyrətin önündə səcdəyə gələn
Yolunda can verib ruhən yüksələn
Qanıyla zülmətin bağrını dələn
Qoynunda uyuyan şəhiddir Sulduz.

Səndən uzaqlarda yaşasam da mən
Bütün xəyalıma yerləşmisən sən
Eşqin əksik olsa bir an qəlbimdən
Varlığım cansız bir meyitdir Sulduz.
27.05.2009